ഹാങ്ങ്

മൗസ് ക്ലിക്കുകളിൽ നിന്ന്
രക്തമുതിരുന്നു
യു ട്യൂബിൽ അവസാനം കണ്ട
വീഡിയോ ഫയൽ
ലൈവ് കൊലപാതകത്തിന്റെ
അതും
സ്ഥാനഭ്രഷ്ടനാക്കപ്പെട്ട
ഏകഛത്രാധിപതിയുടെ

നീ ബന്ധം വിഛേദിക്കുന്നു

കീബോർഡിലെ ലിപിക്കട്ടകളിൽ നിന്നു
പറന്നു പൊങ്ങിയ
പ്രണയത്തുമ്പികൾ
ചത്തുവീഴുന്നു

ചാറ്റ് റൂമുകളിൽ
മൗനം വെറുങ്ങലിക്കുന്നു

സ്വപ്നങ്ങൾ ഡെസ്ക്ടോപ്പിൽ
നിന്നു ത്രാഷ് ചെയ്യപ്പെടുന്നു

കണക്റ്റിവിറ്റി നഷ്ടപ്പെട്ട്
മെമ്മറി കറപ്റ്റ് ചെയ്യപ്പെട്ട്
ഞാൻ സ്ലോ ആകുന്നു

ഇനി കണ്ട്രോൾ+ആൾട്ട്+ഡിലീറ്റ്