എങ്ങനെ?

ഇത്തിരി സംഗീതമില്ലാതെയോമനേ
നീയാകുമീരടിമൂളുന്നതെങ്ങനെ
ഇത്തിരി വർണ്ണം കടുപ്പിച്ചു ചേർക്കാ‍തെ
ജീവനേ നിന്നെ വരക്കുന്നതെങ്ങനേ
ഉളികോറി നിന് മേനി കൊത്തി നോവിക്കാതെ
ഉള്ളിലെ ശില്പമുണർത്തുന്നതെങ്ങനെ
ഒത്തൊരു മാരിവിൽ കാണാതെ പീലികൾ
നീർത്തിപ്പിടിച്ചുഞാനാടുന്നതെങ്ങനെ
ഇത്തിരിയെങ്കിലും മാനത്തു പാറാതെ
ഞാൻ നിന്റ്റെ കൊമ്പത്തിരിക്കുന്നതെങ്ങനെ
ഇത്തിരി പൂമ്പൊടി ചുണ്ടിൽ പുരട്ടാതെ
നിൻ മകരന്ദം കുടിക്കുന്നതെങ്ങനെ
സൂര്യനെ ധ്യാനിച്ചു കൂമ്പിനിൽക്കാതെഞാൻ
പെട്ടന്നു പൊട്ടിവിടരുവതെങ്ങനെ
അല്പംചിരിച്ചു കളിക്കാതെയൂഴിയിൽ
വാടിക്കൊഴിഞ്ഞുവീഴുന്നതുമെങ്ങനെ
നിന്നിൽത്തിളച്ചുയർന്നാകാശമെത്താതെ
നിൻ നെഞ്ചിലേക്കുപെയ്തൊഴിയുന്നതെങ്ങനെ
തിങ്ങുമിരുൾപ്പുഴനീന്തിക്കടക്കാതെ
പുത്തനുഷസ്സിനെ പറ്റുന്നതെങ്ങനെ
ഇത്തിരി വല്ലതും കുത്തിക്കുറിക്കാതെ
നെഞ്ചിലെക്ഷോഭമൊതുക്കുന്നതെങ്ങനെ