Saturday, November 3, 2012

ഈ പുഴയുടെ ഒരു കാര്യം!



ഒഴുക്കില്ല
ആഴമില്ല
പരലില്ല
കടത്തില്ല

അല്ലാ ഈ പുഴ പിന്നെന്തിനാ

വയറൻ ലോറികൾക്ക്
മൂക്കു മുട്ടെ മണലു തിന്നാനോ
(തിന്ന മണൽ വിലങ്ങനെ കുത്തിയ
ഒരു വയറനാ നമ്മുടെ ബിനീഷിന്റെ
ബൈക്ക് പപ്പടമാക്കിയത്
അവന്റെ തലച്ചോറ് റോട്ടിൽ
കാക്കകൾക്ക് വിളമ്പിയത് )

ട്രെയിനുകൾക്ക് തലങ്ങും വിലങ്ങും
പാ‍യാൻ പാകത്തിൽ
വയസ്സൻ പാലത്തിനു
ചവിട്ടി നിൽക്കാനോ

ഓ ഇപ്പൊ മനസ്സിലായി
പാലത്തിനടിയിലിരുന്ന്
വെള്ളമടിക്കാനല്ലേ
ഉച്ചക്കും വൈകീട്ടും
മുച്ചീട്ടു കളിക്കാനല്ലേ

അല്ലെങ്കിൽ പോട്ടെ
അതുകൊണ്ടല്ലേ
ആയിഷയിത്തയും
ലീലേച്ചിയുമൊക്കെ
ഇരുട്ടിക്കഴിഞ്ഞാൽ
ഈ വഴി വരുന്നത്

അവരുടെ മക്കളും പുത്തൻ
മൊബൈൽ ഫോണുകളിൽ
കളിക്കുന്നത്

ഒഴുക്കൊന്നും വേണ്ട
അധികം ആഴവും വേണ്ട

No comments: