Monday, October 1, 2007

കൂണ്‍കറി

കറിയിലെ കൂണിനുമുണ്ടായിരിക്കണം
ചില ഓര്‍മ്മകള്‍

അടര്‍ന്നു വീഴുന്നതിന്‍ മുമ്പ്
വിരിഞ്ഞു നിന്നതിന്റെ

ചാറ്റല്‍ മഴയില്‍പ്പെട്ട
ഉറുമ്പിന്‍ പട്ടാളം
കാനോപ്പിത്തണലില്‍
തമ്പടിച്ചതിന്റെ

ഒരു ഇടിവെട്ടിനു
താനേ പൊട്ടിമുളച്ച
പെരുവഴിയമ്പലമായതിന്റെ

ദര്‍ദ്ദുര പ്രണയങ്ങള്‍ക്ക്
മൂകസാക്ഷിയായതിന്റെ

“കൂണുപോലെ പൊട്ടിമുളച്ചത്”
എന്ന പ്രയോഗത്തിന്റെ
സാര്‍ത്ഥകതയുടെ

പോളിത്തീന്‍ കവറില്‍
ഫ്രഷായി അടക്കം ചെയ്യപ്പെട്ട്
റീട്ടെയില്‍ ശീതളിമയില്‍
വില്‍ക്കപ്പെട്ടതിന്റെ

മസാലക്കും മുളകിനുമൊപ്പം
തിളച്ചു പൊരിയുമ്പോള്‍
പ്രാണനലിഞ്ഞു പോയതിന്റെ

3 comments:

സനാതനന്‍ said...

ചാറ്റല്‍ മഴയില്‍പ്പെട്ട
ഉറുമ്പിന്‍ പട്ടാളം
കാനോപ്പിത്തണലില്‍
തമ്പടിച്ചതിന്റെ

ഒരു ഇടിവെട്ടിനു
താനേ പൊട്ടിമുളച്ച
പെരുവഴിയമ്പലമായതിന്റെ

നല്ല വരികള്‍ നല്ല എഴുത്ത്

ശിവകുമാറ് അമ്പലപ്പുഴ said...

anayaatha arivukal.....

arinhu munneruvaan aasamsakal!

veendum arivu thedaan arivu neduka....

pradeep said...

nannayittunde koonkari