Thursday, August 8, 2013

അപ്പുറമിപ്പുറം




പരിധിക്കിപ്പുറം എന്നോടുള്ള
നിന്റെ പ്രണയം
ഉപാധികളോടെ

പടികടത്തി എത്ര ദൂരെ
ഉപേക്ഷിച്ചു വന്നാലും
പിന്നെയും തിരിച്ചെത്തുന്ന
“മ്യാവൂ” ശബ്ദം

അപരിചിതമായ
ഏതാൾക്കൂട്ടത്തിനിടക്കും ഓടിവന്ന്
ഒഴിഞ്ഞ കോണുകളിലേക്ക്
കൈപിടിച്ച് കൊണ്ടുപോകുന്ന
ചിരസൌഹ്രുദം

മനസ്സിന്റെ അനന്തമായ
ആഴങ്ങളിലേക്ക് തുറന്നു
വച്ച ചില്ലുജാലകം
മേഘസഞ്ചാരങ്ങൾക്കുള്ള
പാരച്ചൂട്ട്
സൌന്ദര്യ വൈരൂപ്യങ്ങൾ
കാണിക്കുന്ന നിലക്കണ്ണാടി

പരിധിക്കപ്പുറം
ഏകാന്തതേ!
സെമിത്തേരിയിലാണ്
നിന്റെ ഏറ്റവും സുന്ദരമായ മുഖം
ഞാൻ കണ്ടത്
ഉപാധികളൊന്നുമില്ലാതെ
നിന്നെ പ്രണയിച്ചു നിൽക്കുന്നു
വലിയൊരു നിശ്ശബ്ദത

No comments: