പരിഷ്കാരം

വ്രുത്തികെട്ട ശരീരത്തെ
വ്രുത്തിയാക്കി നിരന്തരം
പട്ടുചുറ്റി നടന്നെന്നാൽ
പരിഷ്കാരമതിന്നു പേർ

കുമ്പസാരം

ചെയ്തുകൂട്ടുന്നോരനര്‍ത്ഥത്തിനാഘാത-
മെത്രയ്യാണെന്നൊന്നറിഞ്ഞുകൂടാ
കുറ്റക്രിത്യങ്ങളും ക്രിത്യ വിലോപവും
വേട്ടയാടുന്നെന്നെ നിദ്രയിലും
എത്രമേല്‍ പൂഴ്ത്തിഞാനോര്‍ത്തുവച്ചീടിലും
സത്യമൊരുനാള്‍ പുറത്തുവരും
അന്നെന്റെ എല്ലാ മുഖം മൂടിയും കീറി
മാലോകരെന്നെ പരിഹസിക്കും
അന്നെന്റെ തെറ്റിനും കുറ്റക്രിത്യങ്ങള്‍ക്കു-
മൊക്കെ വിചാരണ നേരിടും ഞാന്‍
ഈ കുറ്റപത്രങ്ങളെല്ലാം മുഴുവനായ്
ഏറ്റുവാങ്ങട്ടെ ഞാനിന്നൊടുക്കം
എന്റെ മനസ്സിന്റെ കോടതിക്കുള്ളിലെ
പ്രതിക്കൂട്ടിലെന്നേ നില്പാണു ഞാന്‍
കാലം വിധിക്കും ശിക്ഷയും കാത്തുകൊ-
ണ്ടെന്നേ മുഖം കുനിച്ചേകനായി

പ്രലോഭനം

ടാറിട്ടു മിനുക്കിയ ഉദരപ്രദേശവും
ചീര്‍ത്ത കോണ്‍ക്രീറ്റ് സ്തനങ്ങളും തുടകളും കാട്ടി
നഗരം വിളിച്ചു
അടുത്തുചെന്നപ്പോള്‍ കണ്ടു
ചൂഷണം ചെയ്യപ്പെട്ട അരക്കെട്ടും
ഗുഹ്യരോഗത്തിന്റെ
മാറാവ്രണങ്ങളും

കൊട്ടേഷന്‍

മലമുകളിലെ നില്‍പ്പന്‍ ബാറില്‍1
മേഘങ്ങള്‍ ലഹരി നുണഞ്ഞു
ആക്രമണ പദ്ധതിയുടെ
കരട് തയ്യാറാക്കപ്പെട്ടു
വീര്യം സിരകളെ ഗ്രസിച്ചപ്പോള്‍
പദ്ധതി നടപ്പാക്കപ്പെട്ടു
മാനത്തുനിന്ന് തെരുതെരെ
ചരല്‍ വാരിയെറിയാന്‍
മേഘങ്ങള്‍ക്ക് കൊട്ടേഷന്‍ കൊടുത്തത്
ആരാണ്


1-നില്‍പ്പന്‍ ബാറ്=നിന്നു കൊണ്ട് മാത്രം മദ്യപിക്കാവുന്ന ബാര്‍

പിച്ചും പേയും

പനിക്കിടക്കയില്‍ കിടക്കവെ
കിതച്ചോടിയ കാലം
എന്റെ മുമ്പില്‍
ഇഴഞ്ഞു നടന്നു

ഘടികാര സൂചിയുടെ ശബ്ദം
കാതു തിരുമ്മിപ്പറിക്കുന്നു
നാവില്‍ മറ്റൊരു കയ്പുകൂടി
തെഴുക്കുന്നു

കോട്ടയും കോട്ടവാതിലും
വലം വച്ചൊരു കാറ്റ്
ജാലകത്തിലൂടെ നൂണ്
ചര്‍മ്മത്തെ സ്പര്‍ശിക്കുന്നു

ശിരസ്സില്‍ പ്രഭാതം
മദ്ധ്യാഹ്നമായ് നിന്നുകത്തുന്നു
ക്ഷീണസാന്ദ്രമൊരു സ്മ്രിതി
വഴുതി വീഴുന്നു
കയ്യില്‍ പട്ടത്തിന്റെ നൂലുമായ്
വരമ്പിലൂടോടുന്നൊരു പയ്യന്‍
വിളഞ്ഞ നെല്‍ക്കതിര്‍ കറ്റക്കളം
മെതി, പാട്ട്
തോട്ടില്‍ വീണ് കുത്തൊഴുക്കില്‍
മുങ്ങിയും പൊങ്ങിയും
പേടിപ്പനി നാലുദിവസം
മണ്ണാന്റെ മന്ത്രച്ചരട്
അമ്മയുടെ പ്രാര്‍ത്ഥന
തീരാത്ത വഴിപാടുകള്‍

പിന്നെയും പനി കത്തുന്നു
ശിരസ്സില്‍ കണ്ണില്‍ നെറുകില്‍

ഇന്നു ചീറിപ്പായുന്നു വണ്ടികള്‍
നൂറടി റോഡ് കോപ്ലക്സുകള്‍
മുക്കിന് മുക്കിന് നഗറുകള്‍
പുത്തന്‍ പണക്കാരും പത്രാസ്സും
കോളനി വാഴ്ച്ച ആഘോഷം
കമ്മിറ്റി പണപ്പിരിവുകള്‍
സൌഹ്രുദങ്ങളിലങ്കിളും ആന്റിയും
ഓര്‍ക്കുട്ടും എസ്.എം.എസും
പ്രണയങ്ങളിലപ്പടി മിസ്സ് കാളുകള്‍

പനി പെരുക്കുന്നു

കണ്ണുകള്‍ ചുവന്ന്
ഞാന്‍ അബോധം നിറഞ്ഞ് വീര്‍ക്കുന്നു
നെറ്റിയില്‍ നനച്ചിട്ട ശീല വരണ്ട്
വടിപോലെ കിടക്കുന്നു

മറന്നു പോയ വാക്ക്

നാവിന്‍ തുമ്പുവരെ വന്ന്
പറച്ചിലാവാതെ പിടച്ചു
മറവിയുടെ തോടിന്നുള്ളില്‍
ഇരുട്ടില്‍ക്കിടന്ന് പകച്ചു

ബഹളങ്ങളില്‍ നിന്നൊഴിഞ്ഞ്
തലച്ചോറിലെവിടെയോ സമാധികൊണ്ടു
ആത്മജ്ഞാനം സിദ്ധിക്കയാലൊ എന്തോ
സമാധിയില്‍ നിന്നുണര്‍ന്ന് പ്രയാണം തുടങ്ങി

ഓര്‍മ്മയുടെ പുരാതന നഗരങ്ങള്‍ പിന്നിട്ട്
ബോധത്തിന്റെ നിബിഡ കാനനങ്ങള്‍ പിന്നിട്ട്
ജനിമ്റുതികളുടെ കാട്ടരുവികളില്‍ കുളിച്ച്
ഉടലാര്‍ന്ന് രൂപമാര്‍ന്ന് അര്‍ത്ഥം ധരിച്ച്
എതിര്‍പ്പുകളെ ത്രിണവല്‍ഗണിച്ച്
ഒരു നാള്‍ പുറത്തുചാടി
വരണ്ട ചുണ്ടുകള്‍ അതിനെ
സത്യം എന്ന് ശബ്ദപ്പെടുത്തി