കവിതയുടെ നാനാര്‍ത്ഥങ്ങള്‍

കവിതയില്‍ ചാഞ്ഞിരിക്കാം
ചെരിഞ്ഞിരിക്കാം
മലര്‍ന്നുകിടന്ന്
നീലാകാശം കാണാം
കവിത സ്വാതന്ത്ര്യപ്രഖ്യാപനമാണ്

ബോംബ് വര്‍ഷിക്കപ്പെടുന്ന
ആകാശങ്ങളില്‍ നിന്ന്
യുദ്ധക്കെടുതികളില്‍ നിന്ന്
പലായനം ചെയ്യാന്‍
വിധിക്കപ്പെടുന്ന
ജനതകള്‍ക്ക്
കവിത ഒരു നീണ്ട നിലവിളിയാണ്

ചോര തളം കെട്ടിനില്‍ക്കുന്ന
മനുഷ്യമാംസം മണക്കുന്ന
തെരുവുകളില്‍
കവിത രതിയും സ്വപ്നവും
പ്രണയവുമാകുന്നതെങ്ങനെ

കവിത അതിജീവനത്തിന്റെ
അതിഭീകരമായ
ഉണങ്ങാത്ത മുറിവുകളായിരിക്കണം

ക്ഷണം

നരകതീര്‍ത്ഥം
ഭുജിക്കുവാന്‍ ഇന്നലെ
ചെകുത്താന്‍മാര്‍
എന്നെ ക്ഷണിച്ചിരുന്നു

സ്വര്‍ഗ്ഗരാജ്യത്തെക്കുറിച്ചുള്ള
പ്രഭാഷണം കേള്‍ക്കുവാന്‍
മാലഖമാരും

ഭൂമിയിലെ മുള്ളുകളിലേക്ക്
ഇറങ്ങി ഞാന്‍ നടന്നു